Bangkay sang lalaki nga ginputos sang garbage bag ang ulo kag ginhal-id sa kilid sang karsada sa San Joaquin, Iloilo nakilala na

Nakilala na ang bangkay sang lalaki nga ginputos sang garbage bag ang ulo kag ginhal-id sa kilid sang karsada sa Barangay Qui-anan, San Joaquin sang Hunyo 3 sang aga.

Ginkilala sang amay kag live-in-partner niya ang lalaki nga si Joemar Blanco, 39 anyos sang Barangay Tanque Ilaya, Roxas City, Capiz.

Suno kay Police Captain Felix Perez, hepe sang San Joaquin Police Station, nagatrabaho sa delivery sang mantika sa Iloilo City si Blanco.

Natukiban sang San Joaquin police nga may yara sang kaso ang biktima sa Jaro sang 2022 sa diin nadakpan ini nga may pusil kag illegal nga droga.

Sa pihak sini, blangko gihapon ang police sa motibo sa pagpatay sa biktima.

Una diri, ginpahayag sang SOCO nga wala sang nakita nga pilas sa biktima.