ILOILO CITY — Nag-surrender paagi sa Aksyon Radyo Iloilo ang suspect sa pagpatay sa bouncer sa Brgy. San Felix, City Proper sang Hulyo 26 sang kaagahon.
Ang suspect si alyas Lemuel, 21-anyos, residente sang Lapuz Norte, Lapuz.
Madumduman nga una nga nag-abot sa arrozcaldohan ang biktima antes nag-abot ang grupo sang mga suspect. Pila ka minutos ang nakaligad, may pagbaisay nga natabo tubtob nga ginbuno sang suspect ang bouncer.
Gindala pa sa ospital ang bouncer pero napatay.
Sang Hulyo 30, nagpaguwa sang cartographic sketch ang Iloilo City Police Station 7 sang suspect kag kaupod niya nga babaye sang natabo ang krimen. Nangin palaagyan ini agud makilala ang suspetsado.
Sa interview sang Aksyon Radyo Iloilo news team kay Alyas Lemuel, ginsaysay niya nga nagpanago siya sa Bacolod City.
May abogado nga kaupod ang suspect sang ginkuhaan sang pahayag sang news team.
Ginpabutyag ni Lemuel nga luyag niya mag-surrender agud atubangon ang kaso batuk sa iya.
Nagpangayo man siya sang pasensiya sa pamilya sang bouncer.
