ILOILO–Nakapreparar sang pondo ang Provincial Disaster Risk Reduction and Management Office (PDRRMO) para sa posible nga epekto sang “very strong” El Niño sa probinsya sang Iloilo.
Suno kay Iloilo Governor Arthur Defensor Jr. sa iya press conference, may yara sang ₱82.9 milyon nga Quick Response Fund (QRF) ang PDRRMO, nga kabahin sang 30% nga pondo para sa emerhensya.
Ginplastar sang gobernador ang Provincial Task Force agud isa-isahon kag usisaon ang mga intervention nga kinahanglan ipatuman, ilabe na kon maglala ang epekto sang init.
Dapat praktikal kag direkta sa kinahanglanon sang mga pumuluyo ang mga solusyon, tungod may mga banwa na nga nagaatubang sang problema sa suplay sang tubig, dugang pa sang gobernador.
Ginakonsiderar nga bulig sang probinsya amo ang paghatag sang fuel ukon gatong para sa mga truck nga mahakot sang tubig, upod ang bulig sang Bureau of Fire Protection (BFP) sa pagresponde sa mga lugar nga nagakinahanglan sang suplay sang tubig.
Ginatun-an na sang IPG ang paghatag sang dugang nga kapasidad kag kagamitan agud mas mapadasig ang paghakot kag pagpanagtag sang tubig sa mga banwa nga apekatado sang drought.
Mahimo gihapon nga mangin basehan ang mga intenventions nga ginpatuman sang nagligad nga mga tuig, apang kinahangalan anay usisaon suno sa aktuwal nga sitwasyon kag kinahangalanon sang tagsa ka banwa.
