[WARNING: Graphic content]
ILOILO — Patay ang anay punong barangay kag subong barangay treasurer sang Caboloan, Leon sang gintiro sang wala pa makilal-an nga suspetsado sa Brgy. Bacolod las-6:30 kaina sang aga.
Ginkilala ang biktima kay Teresa Amualla, 59-anyos sang Barangay Caboloan sang amo man nga banwa
Suno kay Police Lieutenant Danilo Noca, Deputy Chief of Police sang Leon Municipal Police Station, nagabantay sang salakyan ang biktima sa waiting shed sang ginpalapitan sang suspect kag gintiro sa ulo.
Ginpahayag sang nakakita nga ginabanta 5’3 tubtob 5’6 ang kataason sang suspect, naka-itom nga t-shirt kag naka-maong nga dilargo.
Pagkatapos gintiro ang biktima, gilayon nagsakay ang suspect sa motorsiklo nga nagahulat sa unhan, suno sa police.
Gindala pa sa Leon Health Center si Amualla pero gindeklarar nga dead-on-arrival.
Ginapadalman pa sang police ang motibo sa pagpatay sa biktima tungod wala sang dugang nga impormasyon nga ginhatag ang pamilya.
Sa impormasyon sang pamilya, nagserbe nga punong barangay sang Barangay Caboloan si Amualla halin 2006 tubtob tubtob 2013 kag treasurer sang barangay halin 2006 tubtob subong nga tuig.
Wala na sang plano nga magpadalagan sa eleksyon sa Oktubre si Amualla suno sa iya pamilya gani palaligban kun ano ang motibo sa krimen.
Sa subong, gina-imbestigaran sang police ang tanan nga anggulo nga maangut sa krimen.
