ILOILO CITY — Ginabanta sa P442,000 ang balor sang suspected shabu nga na-recover sang mga otoridad sa buy bust operation sa Brgy. Airport, Mandurriao sang Hulyo 18 sang kaagahon.
Ginkilala ang subject kay James Michael Chua, 35-anyos sang Brgy. MH Del Pilar, Jaro kag ginakabig sang mga otoridad nga distributor sang illegal drugs sa siyudad kag probinsiya sang Iloilo.
Suno kay Capt. Val Alan Cambel, hepe sang Mandurriao Police Station, gin-ako sang subject nga nagabaligya siya sang illegal nga druga tungod sa kapigaduhon.
Nagakuha sang supply si Chua sa Mantinlupa kag konektado sa daku nga sindikato nga naga-operate sa siyudad kag sa probinsiya, dugang pa sang police.
Base man sa imbestigasyon sang mga otoridad, ginapadala kun kaisa ni Chua sa mga rider ang gina-order sa iya nga items. Siya naman ang personal nga nagadul-ong kun dalagko ang transaksyon.
11 tanan ka sachets sang suspected shabu ang na-recover sang mga operatiba lakip na ang buy bust item. Nakuha man sa iya ang P25,000 nga buy bust money kag iban pa nga mga non-drug items.
