Lalaki patay sang gintiro sa sulod sang ila balay sa Molo

Iloilo City — Patay sang gintiro sa sulod sang ila balay sa Zone 3, Boulevard, Molo ang lalaki nga ginkilala kay Armando Samson, 60-anyos, residente sang nasambit nga lugar.

Sa inisyal nga impormasyon halin sa mga residente, ginsukot sang P1, 000 nga utang si Samson apang wala siya sang may ginhatag tungod P50 na lang ang iya kwarta.

Ginkilala ang suspek kay Nonoy Catalan, 60-anyos, residente man sang nasambit nga barangay.

Ginpahayag sang mga residente nga antes gintiro si Samson, may baisay pa nga natabo. Anum ka lupok ang nabatian sang mga residente.

Nasaksihan pa sang kabataan sang biktima ang pagtiro sa iya.

Nagpalagyo naman si Catalan.

Si Samson ang may lima ka mga kabataan kag nagabaligya sang lamayo sa Zarraga. —via Justice Savvanah Pamplona/Jeremae Ventar