2 ka tuig nga bata patay sang nalumos sa tub sa Balantang, Jaro

ILOILO CITY — Patay ang duha ka tuig nga bata nga babaye sang nalumos sa tub sa Brgy. Balantang, Jaro kahapon sang hapon, May 11.

Una na nga gin-report nga sa drum nalumos ang bata pero gintadlong ni Punong Barangay Allan Jastia nga sa tub siya nalumos.

Ginpabutyag ni Jastia nga halin siya sa meeting kaina sang ginpahibalo siya nga may nalumos nga bata sa sapa pero sang ginkadtuan niya, sa tub sa sulod sang banyo nalumos ang bata.

Sa pagpangusisa ni Jastia, nagkadto sa banyo ang bata kag posible nga ginlab-ut ang kabo sa tub gani nagsulod kag nalumos.

Ginabanta nga taga-hawak sang bata ang tubig sa tub.

Posible man suno kay Jastia nga nagkadto sa banyo ang bata tungod naanad na nga nagakadto sa banyo agud magpaligo kag maghampang.

Kaina, nadiparahan sang amay nga nagakalumos na ang iya nga bata gani ginhingagaw salbar kag nagpangayo sang bulig.

Gindala pa sa ospital ang bata pero napatay. — Aksyon Farrah Mae Morano