Mga security agencies sa Iloilo City i-meeting ni Mayor Raisa Treñas agud i-review ang ila protocols sa hiring kag operations

ILOILO CITY — Ipatawag ni Mayor Raisa Treñas ang mga security agencies sa siyudad agud usisaon ang mga hiring kag operations protocols nga ginapatuman sa mga security guards.

Ini may kaangtanan sa pagtiro sang security guard sa naga-obra sa fish section sang Savemore sa Festive Walk Mall sa Mandurriao kahapon.

Suno kay Treñas, importante nga ma-review ang mga protocols nga ini tungod kon kaisa nagakinahanglan lang sang seminar ang mga security guards agud ma-remind sang ila nga mga pagsulundan.

Tungod, kon lantawon ang sirkumstansya, suno kay Treñas, manabaw ang ginhalinan sang pagpangtiro sang security guard sa biktima.

Ginakabig ni Treñas nga isolated ang kaso kag gintugyanan si ICPO Director PCOL Wilbert Parilla nga imbestigaran ang natabo. — Aksyon Marvin Malificiar