2 ka PSTMO traffic aides gindakup sang LTO enforcer tungod wala nagasuksok sang standard helmet; Motorsiklo sang isa ka traffic aide indi rehistrado
ILOILO CITY – Ginkumpirmar sang reliable source sang Aksyon Radyo Iloilo sa Land Transportation Office nga may gindakup ang ila enforcer nga mga traffic aides sang Public Safety and Transportation Management Office.
Ginparahan sang LTO enforcers sa Infante, Molo sang Agosto 11, las-tres sa hapon, ang apat ka traffic aides nga naga-angkasanay sa duha ka motorsiklo tungod nga wala sila nakasuksok sang standard helmet.
Gin-isyuhan sang ticket ang duha ka drivers kag gin-confiscate ang ila mga driver’s license. Pero nadugangan ang violation sang isa ka driver tungod natukiban nga indi rehistrado ang iya motorsiklo.
Base sa Motorcycle Helmet Act of 2009, dapat nga isuksok sang driver kag angkas sang motorsiklo ang prescribed standard motorcycle helmet. Ang violator magabayad sang penalty nga P1,500 sa first offense, P3,000 sa second offense, P5,000 sa third offense, kag P10,000 plus confiscation sang lisensya sa masunod nga mga offense.
Dugang sang reliable source sang Aksyon Radyo Iloilo, nagapaguwa ang mga traffic aides sa University of the Philippines Visayas pagkatapos sang ila nga MMDA lecture.
Nakit-an sang agents sang LTO, suno sa source, nga madamo pa gid nga traffic aides nga sakay man sa motorsiklo ang naglikaw sa ginapuwestuhan sang LTO.
