ILOILO CITY – Wasak ang windshield sa driver side sang bus sang nakabunggo sa haligi sang Buhang Flyover sa Jaro kahapon, Agosto 24.

Base sa impormasyon nga nakuha sang Aksyon Radyo Iloilo, mga Barangay Health Workers (BHWs) ang sakay sa JRN Liner. Halin sa Iloilo Sports Complex ang ginabanta 50 ka mga sakay tungod nagtambong sila sa BHW Congress sang Iloilo province kag papuli na kuntani sa Passi City.

Suno kay Iloilo Provincial Health Office Head Dr. Maria Socorro Quiñon, anum ang gin-report nga napilasan. Minor lang ang pilas sang anum.

Sa interview kay Venancio dela Cruz nga driver sang bus, halin sila Iloilo Sports Complex kag naglabay sa coastal area. Sang nagahilapit na sila sa intersection sa idalom sang Buhang Flyover agud magliko kuntani padulong sa direksyon sang Tagbak Terminal, gin-aku ni dela Cruz nga nasilawan siya sa silak sang adlaw kag tungod man sa naka-park loader truck sa kilid sang karsada, nag-antad siya pero wala niya natalupangdan ang beam sang haligi sang flyover rason nga nakabunggo.