ILOILO — Dakup sa drug buy bust operation sa Brgy. Balibagan Este, Santa Barbara kahapon, Agosto 27 ang mag-amay nga ginakabig sang police nga street level individual (SLI) drug personalities.
Ginkilala ang mga subject kanday Felix Siojo Jr., 59-anyos, kag Felix Lino Siojo, 20-anyos, sang Sta. Barbara.
Suno kay Police Major Jose Rey Pabalan, hepe sang Santa Barbara Municipal Police Station, nagagamit ang mag-amay sang motorsiklo sa ila mga transaksyon kag masami ang bata ang naga-deliver. Natabuan nga ang mag-amay ang nag-transaction sa police poseur-buyer kag nadakpan, suno sa hepe.
Base sa imbestigasyon sang police, naga-transaction sa Sta. Barbara kag Pavia ang mag-amay. Samtang ginahibalo pa kun diin nagakuha sang supply ang duha.
Isa ka semana ang monitoring sang Sta. Barbara Police sa mag-amay antes ang buy bust operation.
Na-recover sa subjects ang duha ka plastic sachet sang suspected illegal drugs nga ginabanta nagabug-at sang tatlo ka gramo kag may standard drug price nga P20,400 kag buy bust money nga P1,500.
Preso na sa Sta. Barbara Municipal Police Station ang mag-amay.
