Nagapanimaho na sang nasapwan ang mag-asawa sang nasapwan sa sulod sang ila balay sa Sitio Wayang, Brgy. Poblacion 4, Hamtic Antique kahapon, Oktubre 11.
Ginkilala ang asawa kay Anastasia, 75-anyos, samtang ang bana ginkilala kay Loreto, 69-anyos.
Ginpahayag ni Police Senior Master Sergeant Oliver Villanueva, Chief Investigator sang Hamtic, Antique Police Station, nga sa ila initial investigation, las 7 sang aga sang Domingo, Oktubre 8 sang nakabati sang lupok ang mga residente sa barangay apang ila ginbalewala tungod naga-ulan.
Makaligad ang tatlo ka adlaw, may napanimahuan ang mga residente sa balay ang mag-asawa rason nga nag-report sa pulis.
Sang ginkadtuan sang mga pulis, nasapwan ang asawa nga yara sa katre, ginahabulan kag ginbutangan sang moskitero. Nasapwan naman ang bana sa kwarto nga may pilas sang pagkatiro sa tiyan kag may 12-gauge shotgun malapit sa iya bangkay.
Nagapati ang kabataan sang mag-asawa nga wala sang foul play nga natabo kag nagdesisyon nga indi na pagpa-autopsy.
Nagapati naman ang pulis nga posible sang Domingo sang aga ukon hapon napatay ang asawa tungod sa ginasuprer nga balatian. Ginapatihan man sang pulis nga ginplastar anay sang bana ang iya asawa antes nagpanginmatay.
Madamo nga residente ang nakahibalo nga tuman ka palangga ni Loreto si Anastasia.
May ginabatyag nga balatian si Anastasia kag madugay man nga nagtenir sa ospital. Nahibaluan nga sang Mayo lang nakaguwa sa ospital ang asawa.
