“Handom niya gid maka-abot sa [lugar nga] natawuhan sang Kristo” —Mrs. Paterna Prodigo, iloy ni Mary Grace Prodigo-Cabrera nga napatay sa pag-atake sang Hamas sa Israel

MAASIN, Iloilo —Mabuot kag mabinuligon sa iya mga utod kag ginikanan si Mary Grace Prodigo-Cabrera, ang taga-Barangay Burak, Maasin nga caregiver nga napatay sa pag-atake sang Hamas militants sa southern Israel.

Ini ang paglaragway ni Mrs. Paterna Prodigo nga iloy ni Cabrera sang ginpadulungan sang Aksyon Radyo Iloilo news team sa ila balay.

Suno kay Paterna, nagpasimpalad ang iya bata nga magtrabaho sa luwas sang pungsod, una sa Hong Kong antes sa Israel, agud nga makabulig sa iya pamilya. Bisan nga nakapamana na si Cabrera sang taga-Pampanga, nagapadala gihapon siya sang kuwarta sa ila balay, suno kay Paterna.

Nagatrabaho si Cabrera sa Kibbutz Be’eri, ang komunidad malapit sa border sang Gaza, nga una gid nga gin-atake sang Hamas sang Oktubre 7.

Ginbuyagyag ni Paterna nga madugay naman nga handom ni Cabrera nga makakadto sa lugar nga natawuhan ni Kristo gani tuman ang iya kalipay sang nakatrabaho diri. Sa pagkamatuod suno sa iloy, gina-istorya ni Cabrera sa iya ang tanan niya nga makadtuan sa Israel. “Handom niya gid ran nga maka-abot tana sa natawuhan kang aton Ginoo. Sobra ang kalipay niya nga naka-abot tana sa [Israel].”