Kolektor sang lending company gin-hold up sa Oton
ILOILO — Nataban sang duha ka wala makilala nga mga lalaki ang P10,000 nga koleksyon sang kolektor sang lending company nga nagreklamo gin-hold up sa Brgy. Pakiad, Oton.
Ginkilala ang kolektor kay Marlon Sabio nga taga-Sta. Rita, Oton.
Suno sa driver nga si Jose Jerry Salcepuedes, halin sila sa Brgy. Cagbang kag nagdiretso sa Brgy. Pakiad para sa ulihi nila nga sulukton.
Pabalik na sila sa siyudad sang ginbalabagan sila sang duha ka mga lalaki nga nakasakay man sa motorsiklo.
Nagpanaug suno kay Salcepuedes ang angkas kag gintayaan sang caliber 45 nga pusil. Sunod nga ginpangkuha ang ila mga sling bag.
Nakuha sa driver upod sa iya bag ang iya cellphone, lisensiya, kag P500 nga kuwarta.
Luwas sa ila koleksyon, nakuha man kay Sabio ang P1,000 niya nga personal money.
Wala na makapangayo sang bulig ang duha tungod sa kulba kag wala man nila makilala ang hitsura sang mga nag-hold up sa ila tungod nga naka-bonnet kag naka-helmet ang mga suspects. Wala man nila matandaan ang plate number sang motorsiklo sang mga hold-upper.
Sa subong gina-imbestigaran pa sang Oton Police ang natabo kag gina-review ang kuha sang mga CCTV camera sa lugar agud ma-validate ang pahayag sang duha.
