Duha sa mga pasahero sang Ceres bus nga nahulog sa pil-as sa Hamtic, Antique nakaguwa na sa ospital

Nakaguwa na sa ospital ang duha ka mga pasahero sang nahulog nga Ceres bus sa pil-as sa Barangay Igbucagay, Hamtic Antique sang Disyembre 5.

Suno kay Mr. Michael Tolentino, Local Disaster Risk Reduction Management Officer 3 sang Antique Provincial Disaster Risk Reduction Management Office, duha sa apat ka mga pasahero nga estable na ang kondisyon nga na-admit sa Angel Salazar Memorial General Hospital sa Antique ang nakaguwa na samtang ang isa gindala sa Iloilo Mission Hospital sa Iloilo City tungod ipaidalom sa operasyon.

Una nga ginpahayag ni Mr. Broderic Train, head sang Antique PDRRMO, nga mahimo makaguwa ang mga pasyente nga estable na ang kondisyon sa katapusan ukon sa madason nga semana.

Nagapabilin sa 19 ang numero sang mga napatay tungod sa pagkahulog sang Ceres bus sa pil-as sa Hamtic, Antique.