ILOILO — Tatlo ka pilas sang pagkabuno ang gintunaan sang kamatayon sang seaman sa Barangay Omambog, Leon las-9:16 kagab-i.
Suno kay Police Lieutenant Cosmeflor Marco Jr., officer-in-charge sang Leon Municipal Police Station, nagpundo ang biktima nga si alyas Mike, 39-anyos sakay sa iya salakyan sa atubang sang suspect nga si alyas Joe, 39-anyos kag iya mga abyan nga naga-inom.
Gintawag sang biktima ang suspect kag gintayaan sang pusil. Gin-agaw naman ini sang upod sang suspect kag ginpalagyo.
Gin-ulu-uluhan ang biktima sang iya live-in partner nga mag-untat na kag nagbulig man ang mga kaupdanan sang suspect.
Nagpadulong sa balay sang suspect ang biktima upod sa iya live-in partner agud kuntani magpangayo sang pasensiya pero hinali lang siya ginbuno.
May daan na nga hiligut-anon ang suspect kag biktima pero naghingyo ang pamilya nga indi na pag-isaysay.
Nakumpirmar naman nga may pusil ang biktima tungod gin-turnover ini sang upod sang suspect sa barangay officials.
Preso ang suspect kag ginatun-an pa kon homicide ukon murder ang ipasaka nga kaso batuk sa iya.
