PASSI CITY – Wala gid sang bilin nga kagamitan ang mag-asawa nga senior citizens sang na-abo sa sunog ang ila balay sa Sitio Bung-aw, Brgy. Talongonan, Passi City kahapon sang kaagahon, Oct. 22.
Base sa panaysayon sang mag-asawa, nakabugtaw sila sang nakabatyag sang tuman ka init kag nakita nga nagakalayo na ang ila balay. Madasig nga nagguwa sa balay ang mag-asawa gani wala sila sang may nasalbar nga kagamitan.
Masobra 10 kilometros ang kalayuon sang lugar halin sa siyudad kag malaka ang mga pamalay rason nga wala sang may napangayuan sang bulig ang mag-asawa.
Sa initial estimates sang BFP-Passi City, naglab-ut sa P12,600 ang kahalitan sang sunog.
Indi pa matumod ang ginhalinan sang kalayo.
Nag-apelar naman sang bulig ang mag-asawa pareho sang pagkaon, ilimnon, mga kagamitan tungod wala gid sila sang may nasalbar.
