P1.4 million nga balor sang suspected shabu na-recover sa drug buy bust sa Molo
ILOILO CITY — Na-recover ang P1.4 million nga balor sang suspected shabu sa apat ka mga nadakpan sa drug buy bust operation sa Zone 5 Boulevard, Molo kagab-i, Disyembre 13.
Ginkilala ang subjects kanday Jenny Gonzales, Franklin Senerado, Reynaldo Porras kag Vilma Malagad.
Suno kay Police Lieutenant Colonel Antonio Benitez Jr., head sang City Drug Enforcement Unit, nakaagi na preso may kaangtanan sa ilegal nga druga ang mga nadakpan nga kanday Porras kag Malagad samtang gina-validate pa ang background nanday Gonzales kag Senerado.
Ginpahayag man ni Benitez nga subject for validation pa ang impormasyon may kaangtanan kay alyas Bart nga ginpahayag nagadul-ong sang supply sang illegal drugs sa balay ni Gonzales.
Naglab-ot sa duha ka semana ang monitoring sa mga subject tubtob nga nadakpan suno sa police.
Gin-ako naman ni Gonzales nga iya ang caliber 45 nga pusil pero wala siya sang napakita nga dokumento para makapamatuod sini samtang ginpanginwala man sang apat nga mga nadakpan nga ila ang na-recover nga suspected illegal drugs nga ginabanta nagabug-at sang 210 grams.
