ILOILO CITY — Masobra P7.9 million nga balor sang suspected shabu nga nagabug-at sang 1,170 grams ang na-recover sa drug buy bust operation sa Malipayon Delgado, City Proper kagab-i.
Ginkilala ang mga nadakpan kanday alyas Erwin, 28-anyos sang Baldoza, La Paz kag alyas Kim, 40-anyos sang Ingore, La Paz.
Lunsay ginakabig sang police nga High Value Individuals (HVI) ang mga nadakpan.
Suno kay Police Captain Glenn Soliman, team leader sang Regional Police Drug Enforcement Unit (RPDEU) 6, ginagamit ang duha nga bodegero sang ila source kag naga-distribute man sa syudad.
Wala ginbuyagyag ni Soliman ang impormasyon kun sa diin nagakuha sang supply sang illegal drugs ang duha.
Ginpahayag ni Soliman nga duha ka bulan nga gin-monitor ang illegal activities sang duha pero posible nga masobra sa duha ka bulan na nga nagabaligya sang shabu, suno kay Soliman.
Subong nga gab-i, nabaklan ang duha sang isa ka sachet sang suspected shabu sa balor nga P80,000.
Na-recover pa gid ang 22 ka sachets sang suspected shabu kag 14 ka knot tied transparent plastic bags sang suspected shabu; cellular phone; 1 pack sang aluminum foil; salakyan; kag nga non drug items.
Tungod sa pagkadakop sang duha, natapna ang paglapta sang illegal drugs sa syudad ilabe na sa Dinagyang Festival, suno kay Soliman.
Ginhimo ang operasyon sang RPDEU, CDEU, kag City Proper Police Station- SDET.
