ILOILO CITY — Gin-aresto sang Mandurriao Police ang 48-anyos nga lalaki nga nakuhaan sang 45 caliber pistol sa City Time Square, Brgy. Bolilao, Mandurriao las-4:35 kahapon sang hapon, Enero 27.
Ginkilala ang nadakpan kay alyas Bibong sang Balucuan, Sigma, Capiz.
Base sa impormasyon halin sa Iloilo City Police Office, nag-conduct sang frisking ang mga tanod sa City Time Square kag natukiban nga may dala nga pusil si Bibong nga nasulod sa iya sling bag.
Gilayon nga nagpangayo sang bulig ang tanod sa police nga na-deploy sa lugar kag gin-aresto ang lalaki.
Nakuha kay Bibong ang 45 caliber pistol, duha ka mga magazines nga may unod nga tag-pito ka mga bala.
Gindala na sa Mandurriao Police Station ang lalaki para sa proper disposition sang kaso.
Nahibaluan nga ginpatuman ang gun ban sa Iloilo City halin las-12:01 sang kaagahon sang Enero 19 kag magalawig ini tubtob las-12:01 sang kaagahon sa Enero 29 bilang kabahin sang mga safety measures sa Dinagyang 2024.
Sa nasambit nga period, suspendido ang tanan nga Permit to Transport and Carry Firearms Outside of Residence (PTCFOR) magluwas lang sa mga miembro sang law enforcement agencies nga naga-perform sang ila duty. — via ICPO
