Angkas patay, 3 pilason sang nabungguan sang pick-up ang motorsiklo kag tricycle sa Bingawan; driver nadakpan

ILOILO – Patay ang 17-anyos nga naga-angkas sa motorsiklo sang nabungguan sang pick-up ang ginasundan nga tricycle sa Brgy. Poblacion, Bingawan kaina sang aga.

Suno kay Police Lieutenant Philip Girao, officer -in-charge sang Bingawan Municipal Police Station, nagasundanay ang tricycle kag motorsiklo nga pakadto sa banwa sang natabo ang insidente.

Sakay sang tricycle ang mag-asawa nga senior citizen nga taga-Tapaz, Capiz .

Paglab-ut sa kurbadahon nga porsyon sang dalan, nabungguan sang nagasumalang nga pick-up ang tricycle kag naulamid ang motorsiklo nga ginasakyan sang napatay. Naglumpat ang driver sang motorsiklo, base sa imbestigasyon sang pulis.

Gintinguhaan sang mga pulis nga malagas ang driver sang pick-up pero pag-abot sa Brgy. Inamyungan, naabtan ang pick-up pero wala na ang driver.

Sa latest update, nadakpan ang driver sa Brgy. Quinar-upan, Bingawan, suno sa pulis.