Pagpati nga madamo sang nagapinamata 9 ka bulan pagkatapos sang Valentine’s Day indi matuod suno sa CPD 6

Wala sang mga pagtuon ukon datos nga nagasiling nga madamo ang nagapinamata siyam ka bulan pagkatapos sang Valentine’s Day.

Paathag ini ni Commission on Population and Development (POPCOM6) Director Harold Alfred Marshall, sa pihak sang mga pagpati nga madamo sang mga nagabusog pagkatapos sang adlaw sang mga tagipusuon kag nagabun-ag pagkaligad sang siyam ka bulan.

Suno sa iya, kun luyag sang mga magkahagugma nga mag-engage sa sexual activity, pwede man nila ini mahimo sa bisan ano lang nga bulan.

Dugang niya, daw ginbaton na man lang sang kalabanan ang ideya nga madamo ang nagapinamata pagkatapos sang Valentine’s day apang wala ini sang basehan kag kinahanglan pa sang madamo nga pagtuon agud mapamatud-an ini.