Laborer nga nagbuno sa iya kaupod nga laborer sa Jaro ginbalusan kagat sa dulunggan

ILOILO CITY — Nagisi ang wala nga dulunggan sang laborer sang nagbalos ang kapareho niya nga laborer matapos niya ginbuno sang makaduha ka beses sa Jalandoni, Jaro pasado las-11 kagab-i.

Ginkilala ang biktima kay Arnie Alagon, 42-anyos nga taga-Cebu kag temporaryo nga nagatiner sa amo nga barangay, samtang ang suspect amo si Jun Albay, 37-anyos sang San Juan, Molo.

Suno kay PMaj. Eduardo Siacon, Jr., hepe sang Jaro Police, una nga ginbuno ni Albay si Alagon sang makaduha ka beses sa iya kilid gamit ang icepick.

Pero na-agaw ni Alagon ang icepick sa ila pagpukutay kag ginbalusan si Albay paagi sa pagkagat sa iya wala nga dulunggan.

Nagaguwa sa pag-imbestigar sang Jaro Police nga upod pa ang duha nga naga-inum-inom kagab-i sang hinali nagbina-isay nga ginhalinan sang ila pagpukutay.

May daan man nga hiligut-anon ang duha base sa pagpangusisa sang pulis nga magkaupod lang sa isa ka ulubrahan sa Jaro.

Pareho nga gindala sa ospital ang duha para sa pagbulong.