ILOILO CITY — Patay na sang nasapwan subong nga aga sa baybay sang North Baluarte, Molo ang 26-anyos nga lalaki nga nalumos sa suba sa Boulevard sang Lunes, Hulyo 21.
Nakita sang isa ka residente ang bangkay gani nagpangayo sang bulig sa barangay.
Nagkadto ang pamilya sa lugar kag ginkumpirmar nga ang ila himata nga si alyas Buddy ang nasapwan.
Suno sa impormasyon nga natipon sang Aksyon Radyo Iloilo news team, Lunes sang hapon sang naligo sa suba sa Zone 6, Brgy. Boulevard ang lalaki.
Nag-aba siya sa iya upod pero nahulog kag nagsarurot sa tubig tubtob wala na makita. — Aksyon Maria Kayla Tingzon
