ILOILO— Isa ang patay samtang duha ang pilason nga estudyante sang nakabunggo ang ginasakyan nga motorsiklo sa dump truck sa Brgy. Tinocuan, Dueñas kahapon sang udto, Marso 6.
Suno kay Police Senior Master Sergeant Jerome Emplasta, imbestigador sang Dueñas Municipal Police Station, halin sa eskwelahan kag papuli na kun tani sa Brgy Navalas ang tatlo ka grade 10 students sang na-aksidente.
Base sa imbestigasyon, nag-overtake ang motorsiklo sa ginasundan nga truck pero nakabunggo sa kasugata nga dump truck.
Tungod sini, nagtabog ang mga sakay samtang nagsuhot sa truck ang motorsiklo, suno sa police.
Lunsay ginpangdala sa ospital ang tatlo ka sakay sang motorsiklo sa diin napatay ang 14-anyos nga angkas.
Padayon nga ginabulong sa ospital ang 15-anyos nga driver sang motorsiklo kag ang 15-anyos nga isa pa ka angkas.
Gin-custody sang police ang driver sang truck.
