Ajuy, Anilao pwede na makadeklarar sang pertussis outbreak

ILOILO — Puwede na nga makadeklarar sang outbreak sa pertussis ukon whooping cough ang duha ka banwa sa probinsiya sang Iloilo, suno kay Provincial Health Office (PHO).

Suno kay PHO Head, Dr. Maria Socorro Quiñon, ginalakipan ini sang Ajuy kag Anilao.

Ginpaathag niya nga nakasulod ang nasambit nga mga banwa sa guidelines sa pagdeklarar sang outbreak tungod may duha tubtob tatlo na ka mga kaso sang nasambit nga balatian sa isa ka barangay.

Base sa data sang PHO, may tag-tatlo na ka mga kaso ang isa sa mga barangay sang Ajuy kag Anilao.

Kalabanan nga nagakalatnan sang balatian ang mga lapsag nga wala pa makalab-ot sa anum ka semana ang edad.

Nagaplano ang Provincial Government nga magbakal sang dugang nga vaccines para naman sa mga nagabusong apang wala pa sang kuhaan sang budget tungod wala pa nakasulod sa criteria ang probinsiya agud nga magdeklarar sang state of calamity.

Sa karon, temporaryo nga nagbakal ang PHO sang dugang nga 6,688 bottles sang syrup nga antibiotic para sa mga kabataan.

Sa April 13 nga data sang PHO, may 77 ka kabug-usan nga kaso sang nasambit nga balatian sa probinsya sa diin 23 ang laboratory confirmed.

Sa kabug-usan nga kaso, apat ang napatay nga na-record sa Dumangas, San Joaquin, Balasan, kag Bingawan. — via Aksyon Cedrick Anona