ILOILO CITY — Nagtapungulay ang magtiyo nga drivers sang traditional jeepneys sa tunga sang dalan sa atubang sang Mohon Terminal kahapon sang hapon, Hulyo 15.
Sa pagpangusisa sang Aksyon Radyo Iloilo news team, pareho nga nagabyahe sang Villa-Mohon nga jeep ang magtiyo. Pabalik na sila sa Mohon Terminal halin sa siyudad antes natabo ang pagtapungolay.
Sang yara pa lang sa North Fundidor, Molo, nagpahigad ang ginamaneho nga jeep sang tiyo tungod sa pagpati nga may masakay nga pasahero. Gilayon nga nag-overtake ang jeep sang hinablos pero ginlagas man sang tiyo gani iya naunahan.
Una nga nakaabot sa Mohon Terminal ang jeep sang tiyo kag pag-abot man sang iya hinablos, ginsulong niya sa front seat kag ginsumbag sang makapila ka beses.
Nakita man nga dali-dali ang pagpanaog sang mga pasahero sa jeep sang hinablos agud indi madalahig sa kinagamo.
Nauntat lang ang inaway sang may concerned citizen nga nagtambag sa duha.
Gilayon nga nagpauli sa ila balay ang tiyo, samtang nagpa-blotter naman sa Arevalo Police Station ang hinablos. — Aksyon Paula Elambayo
