ILOILO— Nasapwan patay ang 58-anyos nga mangunguma sa kilid sang talamnan sa Brgy. Manaulan, Lambunao kaina sang kaagahon.
Ginkilala ang lalaki kay alyas Jonathan.
Suno kay Police Captain Jose Biadog, officer-in-charge sang Lambunao Municipal Police Station, nasapwan na lang las-5:50 kaina sang kaagahon ang bangkay gani gin-report sa pulis.
Sa initial nga pagpangusisa sang pulis, wala sang may nakita nga pilas sa lawas sang lalaki pero may nakita nga bagras sa agtang nga ginalantaw agi sang pagkadanlog.
Ginpatawgan sang SOCO ang lugar agud matumod ang kamatayon sang lalaki, suno kay Biadog.
Sa pagpangusisa sang pulis, nakit-an pa kagab-i ang lalaki nga naga-inom sang makahulubog nga ilimnon. — Aksyon Farrah Mae Morano
