ILOILO — Ginkumpirmar ni Police Captain Beverly Cataluña, hepe sang Guimbal Municipal Police Station, nga nadakpan sa ila banwa kagab-i ang suspek sa pagpatay kay former Ingore, La Paz Punong Barangay Ernie Poral.
Duha suno sa iya ang nadakpan paagi sa hot pursuit operation sang mga pulis halin sa Iloilo City Police Office (ICPO).
Kaina sang aga, nagabakal sang bubod sa Baldoza, La Paz si Poral sang ginpalapitan sang gunman kag gintiro.
Ginpahayag naman ni ICPO Director Police Colonel Kim Legada nga nasundan sang kapulisan ang suspetsado. “Nagbase kita sa witness account, base lang didto sa iya nga mga ginsuksok nga gamit, ang iya panglakat, kag ang iya hitsura nga may nakakita prior sang natabo.”
Sa duha ka nadakpan sang police, isa lang ang involved sa pagpangtiro sa anay kapitan samtang natabuan lang nga nakaupod niya ang isa pa sang gindakop sila sang police.
NAGAPANGINWALA
Hugot nga ginpanginwala sang suspek sa pagpatay kay anay Punong Barangay Poral nga may kahilabtanan siya sa krimen.
Suno kay Guardaya, wala siya nakahalin sa Guimbal sugod sang Domingo gani imposible nga siya ang nagpatay sa anay kapitan. Sa pagkamatuod, suno kay Guardaya, masaku siya bilog nga adlaw tungod nga nagpangsarahe siya sang kahoy.
Ginpahayag pa niya nga makapamatuod ang iya asawa, mga tupad balay, kag ang tag-iya sang kahoy nga iya ginsarahe nga wala siya nakapadulong sa siyudad.
Nanindugan man si Guardaya nga indi niya kilala ang ginpatay si Poral kag nabatian lang niya sa balita ang natabu nga krimen.
Ginsaysay ni Guardaya nga mapadulong siya kuntani sa Tigbauan kagab-i agud may istoryahon, angkas sa motorsiklo ang iya helper. Nagpundo sila malapit sa Guimbal National High School sakop sang Brgy. Girado-Magsaysay, agud magsuksok sang raincoat tungod naga-ulan.
Nakibot lang si Guardaya sang may nagpanaog sa salakyan nga police, ginpalapitan sila, gintayaan sang pusil, ginposasan, kag may “ginbutang” sa iya likod.
Nagpamangkot pa siya kun ano ang ila sala pero ginpahipos lang siya sang police. Ulihi na nga ginhambal sang police, suno kay Guardaya, nga siya ang suspek sa pagpatay kay Poral. Magluwas kay Guardaya, gindakop man ang iya helper nga si Jerson Genteroso.
Ginpabutyag man ni Guardaya nga wala siya sang criminal record apang nakaagi siya ginkasuhan sang nadakpan nga nag-transport sang puno sang kahoy nga wala sang permit pero na-dismiss ang kaso.
Una na nga ginpahayag ni Iloilo City Police Office (ICPO) Director Police Colonel Kim Legada nga may testigo sila nga naglaragway sa suspetsado.
