Railings nawasak, puno sang palma nautod sang nakabunggo kag naglapaw ang elf truck sa center island sa Diversion Road, Mandurriao

ILOILO CITY — Nautod ang puno sang palma kag nagkalawasak ang ginabanta lima ka metros nga railing sa Diversion Road, Mandurriao sang nakabunggo kag naglapaw ang elf truck nga ginagamit sa pag-deliver sang balas.

Natabo ang aksidente mga las-6:30 subong nga aga.

Suno sa pahinante sang truck, napiyungan ang driver rason nga nadulaan sang kontrol kag nawarik ang manibela sa direksyon sang center island.

Samtang naguba man ang bumper sang truck tungod sa impact sang pagkabunggo.

Sang gin-interview sang Aksyo Radyo Iloilo, ginpahayag sang driver nga nagalingin ang iya ulo nga posible resulta sang pagkabunggo. — via Aksyon Marvin Malificiar