ILOILO — Dakup ang gibakabig daku nga supplier sang illegal nga druga sa 4th District sang Iloilo sa drug bust operation sa Barangay Mostro, Anilao las-5:48 kaina sang hapon.
Subject sa operasyon si alyas Braynus, 41-anyos. Nadakpan man kanday Raymart, 33-anyos kag Justin, 23-anyos, lunsay residente sang amo nga barangay.
Suno kay Police Major Dadje Delima, chief sang Provincial Drug Enforcement Unit (PDEU), magluwas sa mga banwa sa 4th District, naga-supply man sang illegal nga druga ang subject nga si Braynus sa Barotac Viejo.
Nagaserbe nga runner ni Braynus si Raymart, samtang natabuan nga naupod nila si Justin gani gindakup man.
Nagpamalibad si Delima sa paghatag sang dugang nga impormasyon may kaangtanan sa source sang subjects tungod gina-validate pa nila ang impormasyon.
Ginpabutyag man ni Delima nga daku nga kadulaan sa illegal drug trade sa 4th District ang pagkadakop kay Braynus pero wala sila naga-untat sa pag-monitor sa posible pagtuhaw sang bag-o nga players.
