ILOILO CITY—Ginreklamo sang mga residente sang Alalasan, Lapuz, Don Esteban, kag Divinagracia, La Paz ang ongoing nga drainage construction nga hasta subong wala gihapon matapos.
Sa pagpangusisa sang Aksyon Radyo Iloilo sa mga residente, halit sa pangabuhian sang mga tricycle kag sikad driver, estudyante, negosyante ang amo nga proyekto.
Base sa project billboard, Pebrero 20, 2025 ginsuguran ang construction sang amo nga project kag target nga matapos kuntani Enero 8, 2026.
Dugang pa, F. Gurrea Construction Incorporation ang contractor sang amo nga proyekto.
Nagabalor P102, 798, 574.13 ang amo nga project kag ang implementing office amo ang DPWH Iloilo City District Engineering Office.
Naghalin ang pondo sa General Appropriation Act (GAA) 2025.
Ginatinguhaan na sang estasyunan nga ipalab-ut ang amo nga concern sa mga natungdan.
“Kay gale kay layo pa ang aton election, indi sila manaog” — residente
Ginakabig sang residente nga si alyas Inday nga maayo man ang amo nga proyekto sang gobyerno, apang kinahanglan manaog man sila sa ila puwesto kag lantawon kon ang matuod nga sitwasyon sang pumuluyo sa barangay.
Ginpabutyag ni Inday nga wala pa man nagkalamatay ang pumuluyo sang ila barangay kundi nagliniwang lang tungod sa perwisyo sang padayon nga construction, sa diin naapektuhan ang income sang tricycle kag sikad drivers, negosyante kag iban pa, ilabe na kon mag-ulan sa diin malutak ang dalan.
Ginpahibalo naman ni Punong Barangay Jofel Ladiet sang Alalasan, Lapuz. nga btangan sang dakal-dakal ang porsyon sang dalan nga malutak tungod sa ongoing nga drainage construction.
