NEGROS OCCIDENTAL — Patay ang pulis nga na-assign sa Bacolod City Mobile Patrol Unit sang gintiro sang kasubong nga pulis nga na-assign naman sa Mobile Force Company sa Iloilo Police Provincial Office.
Ginkilala ang biktima nga si PSSg Jotham Aremtuto Cañete, 31 anyos sang Barangay Paraiso, Sagay City.
Ang suspek amo nga si Pat. Alvin Rios Fernandez, 26 anyos nga taga-Barangay Bugnay, Valderama, Antique.
Natabu ang insidente pasado las-singko kahapon sang hapon, Mayo 31, sa Tangub, Bacolod City.
Nakaagom sang duha ka pilas sa dughan ang biktima.
Sa interview sang Aksyon Radyo Bacolod kay Police Major Eugene Tolentino, hepe sang Police Station 8, ginpabutyag sang suspek nga naabtan niya ang biktima kag ang iya anay live-in partner nga upod sa balay sang babaye. Posible suno kay Major Tolentino nga nangibabaw ang pagpangimon sang suspetsado rason nga nahimo ang krimen.
Preso na sa custodial facility sang Police Station 8 si Pat. Fernandez nga posible magapangatubang sang kaso nga murder. —via Aksyon Radyo Bacolod
