Dress code ipatuman sa Jaro Cathedral sugod Hulyo 1

Ginpahibalo ni Reverend Father Angelo Colada, director sang Social Communication Office sang Jaro Archdiocese, nga mapatuman sang “proper dress code” sa Jaro Metropolitan Cathedral sugod Hulyo 1.

Sa interview sang Panay News, ginpahanumdom ni Father Colada nga dapat magsuksok sang bayo nga disente ukon presentable kun magsulod sa cathedral. “We encourage dresses, but understand not everyone is comfortable in them.”

Gina-prefer naman ang pagsuksok sang closed shoes pero mahatag man sang konsiderasyon ang simbahan sa may mga medical issues ukon may problema sa kuwarta.

Katuyuan sini suno kay Father Colada nga maayo man tulukon ang nagasimba kag daw wala lang nagalagaw-lagaw ukon makadto sa beach.

“You are in the presence of the Lord, so wear what is proper if you truly value the Eucharist,” suno kay Colada.

Nagalaum si Father Colada nga sundon sang mga masulod sa cathedral ang bag-o nga patakaran bilang pagrespeto sa lugar sang pagpangamuyo kag pagsimba.