5 pilason sang natumba ang Ceres bus sa Barotac Nuevo

ILOILO — Estable na ang kondisyon sang lima ka mga napilasan sang natumba ang ginasakyan nila nga Ceres bus sa Brgy. Lico-an, Barotac Nuevo kahapon, Hulyo 28.

Suno kay Police Captain Cedric Cruz, hepe sang Barotac Nuevo Municipal Police Station, lunsay minor injuries sa butkon kag abaga ang naagum sang mga pilason nga out- patient na sa ospital.

Sa initial nga imbestigasyon sang police, nakakas ang wala nga ruweda sa likod sang bus gani natumba.

Wala pa nahibaluan ang rason kun ngaa nakakas ang ruweda pero ginpahayag sang driver nga nagtabog ang mga turnilyo sini.

Ginahibalo pa sang police kun ginpakay-o ukon na-check sang driver ang bus antes nagbiyahe.

Halin sa Barotac Viejo ang bus kag pakadto sa siyudad nga may 24 ka mga sakay lakip na ang driver kag konduktor.

May iban nga pasahero nga naglakat na lang pagkatapos sang aksidente.

Gin-costudy naman sang police ang driver sang bus pananglitan may pasahero nga mapasaka sang kaso batok sa iya. — via Aksyon Maria Kayla Tingzon