6 dakop sa drug buy bust operation sa abandonado nga balay sa Mandurriao
ILOILO CITY — Anum ka indibidwal lakip ang menor-de-edad nga lalaki ang nadakpan sa drug buy bust operation sa Brgy. Bakhaw, Mandurriao kahapon, Agosto 6.
Subject sang operasyon si John Dexter Safra, 35-anyos sang Brgy. Cuartero, Jaro.
Suno kay Lt. Nick Gallego, team leader sang City Drug Enforcement Unit (CDEU), duha ka semana nga gin-monitor sang police ang subject.
Madamo sang tawo nga nagakadto sa gin-abandonar nga balay nga nahamtang sa kilid sang lunok, suno sa police, kag ginahimo ang lugar para mag-pot session.
Ginpabutyag ni Gallego nga ginatipon anay sang subject ang mga manugbakal kag tingob nga ginahatag ang illegal drugs.
Nadakpan man sang police si Melchor Caro, 31-anyos sang Bakhaw, Mandurriao; kag alyas Ontos, 14-anyos sang Desamparados, Jaro nga nagaserbe nga runner suno sa police.
Natyempuhan kaina nga may mga nagabakal sa lugar gani gindakop man kanday Darius Ladon, 43-antos sang Jalandoni Wilson, City Proper; Inston Pugao, 52-anyos sang San Juan, Molo; kag Joncel Ledesma sang Bakhaw, Mandurriao.
Na-recover ang 60 grams sang suspected shabu nga may standard drug price nga P408,000.
Gina-validate pa sang police ang impormasyon kun diin nagakuha sang supply sang illegal drugs ang subject. — via Aksyon Farrah Mae Morano
