Isa pa ka ginapatihan miyembro sang NPA patay sa encounter sa Lambunao

ILOILO — Isa naman ka ginapatihan miembro sang Communist Terrorist Group (CTG) ang napatay sa encounter batok sa Philippine Army sa Barangay Cabatangan, Lambunao las-10:40 kahapon sang aga, Agosto 7.

Ginkilala ang napatay kay Jose Jerry Tacaisan alias Miller/Bronze, 54-anyos sang Sitio Tabionan, Barangay Bucari, Leon. Ginatudlo siya nga miembro sang Regional Headquarters (RHQ) Komiteng Rehiyon-Panay (KRP) kag former squad leader sang nabungkag na nga Southern Panay Front.

Suno kay Lt Colonel J-Jay Javines, spokesperson sang 3rd Infantry Division sang Philippine Army, ang mga rebelde nga na-engkwentro sang militar sa Lambunao amo man ang na-engkwentro nila sa Calinog sang Lunes, Agosto 5.

Kaina, nagahimo sang combat operations ang militar sa diin na-engkwentro nila ang tatlo ka miembro sang Regional Headquarters (RHQ) kag Central Front, Komiteng Rehiyon-Panay (CF, KR-P).

Na-recover sa encounter site ang M16 assault rifle, 85 rounds sang 5.56mm nga bala, magazines para sa M16, bandolier, subversive documents nga may high intelligence value, kag personal nga kagamitan.

Ginpanginbulahan naman ni 3ID commander Major General Marion Sison ang nag-operate nga mga tropa kag bulig sang komunidad. — via Aksyon Farrah Mae Morano