ILOILO — Napilpilan sang truck kag natuslok sang kahoy ang lawas sang driver nga napatay sang na-aksidente sa Barangay Apelo, Sara las-10:30 kagab-i.
Suno kay Police Lieutenant Brett Balopiños, officer-in-charge sang Sara Municipal Police Station, pag-abot sa nagapakurbada nga porsyon sang dalan, naglamsot ang preno sang truck nga ginamaneho ni alyas Rey, 36-anyos sang Mandalagan, Bacolod City tubtob naglapaw sa kilid sang karsada kag nakabunggo sa tangkal.
Ginalantaw man sang pulis nga rason ang kabug-aton sang karga nga molasses sa paglapaw sang truck sa kilid sang karsada.
Tungod sa impact, natumba ang truck kag napilpilan si Rey.
Naglawig tubtob la-1 kaina sang kaagahon ang pag-rescue kay Rey pero patay na sang nakuha siya sa idalom sang nagpilpil nga truck.
Napilasan sa nagkalain-lain nga parte sang lawas ang iya pahinante nga si Cyril, 37-anyos sang Poblacion Ilawod, Lambunao.
Gindala sa ospital ang pahinante kag estable na ang iya kondisyon.
Halin sa Passi City ang truck kag i-deliver kuntani ang molasses sa Estancia.
