“Dungong Ilonggo, Sugpon sa Kabuhi Mo” bloodletting activity sang Iloilo City government hiwaton sa Agosto 25

ILOILO CITY — Mahiwat sang bloodletting activity ang City Government bilang isa sa mga aktibidad sang ika-87 nga Charter Day celebration sang siyudad.

May tema ini nga “Dugong Ilonggo, Sugpon sa Kabuhi Mo.”

Suno kay Councilor Alan Zaldivar, chairman sang Committee on Health sa City Council, isa ini sa mga inisyatibo sang siyudad agud makatipon sang bastante nga blood supply sa blood bank ilabi pa nga nagadamo ang kaso sang dengue sa Iloilo City.

Hiwaton ang aktibidad sa Robinsons Place Iloilo sa City Proper umpisa las-8 tubtob las-5 sa hapon.

Ginpahayag ni Zaldivar nga nagpasiguro na nga mangin blood donors ang ginabanta 700 ka mga ROTC students sang Phinma UI. Maupod man ang kapulisan kag iban pa nga uniformed personnel.

Pwede man maka-walk in ang mga interesado magdonar sang dugo. Kun indi ma-cater ang kadamuon sang mga donors, may part 2 pa ang bloodletting activity nga posible hiwaton sa una nga semana sang Setyembre, dugang ni Councilor Zaldivar. —via Balita, Banat, Bulig