Kwarta nga nataban sang mga nagransak sa Iloilo Supermart sa Jaro naglab-ot sa P1.5 million

Naglab-ot na sa P1.5 million ang nataban sang mga nagpangawat sa Iloilo Supermart sa Cubay, Jaro sang Martes sang kaagahon.

Suno kay Police Major Eduardo Siacon Jr., hepe sang Iloilo City Police Station 3, rough estimate pa lang ang una nga deklarasyon sang management nga P1.3 million pero sang gin-inventory upod sa Regional Crime Laboratory Office 6, nagguwa nga yara sa P1.5 million ang nadula.

Sa pagpangusisa sang Aksyon Radyo Iloilo News Team sa staff sang grocery store, gin-guba sang mga suspect ang vault tubtob nga mabuksan kag makuha ang kwarta.

Indi naman ini dali-dali mabuksan tungod nagakinahanglan sang combination agud ma-unlock.

Ginalantaw man sang management ang anggulo nga gin-surveillance na sang mga suspect ang lugar rason nga natultulan nila kun diin ginatago ang kwarta.

Padayon ang police nga nagatipon sang CCTV footage kag impormasyon halin sa mga tawo sa palibot nga posible nakakita sang indi normal sa lugar pila ka adlaw antes ang insidente. — via Aksyon Maria Kayla Tingzon