Trabahador sang poultry sa Barotac Nuevo patay sang nasapwan kag madamo sang pilas sang pagkabuno sa lawas

ILOILO— Patay na sang nasapwan ang 35-anyos nga trabahador sang poultry farm sang ginbuno sa Brgy. Cabilauan, Barotac Nuevo kahapon sang aga, Oktubre 3.

Ginkilala ang biktima kay Ronlick Isidro sang Laua-an, Antique.

Suno kay Police Captain Cedrick Cruz, hepe sang Barotac Nuevo Municipal Police Station, gintawag sang iya nga upod ang biktima agud magpamahaw pero nakita na lang nga duguon, may madamo nga pilas sang pagkabuno, kag wala na nagahulag.

Nahamtang sa tunga sang poultry farm ang ginahigdaan sang biktima kag malayo sa ginatulugan sang iban pa nga mga trabahador.

Sa imbestigasyon sang police, mga las-12:15 sang kaagahon nakit-an sa CCTV camera nga may tawo nga nagsaka sa ginahigdaan sang biktima tubtob may naglubag sang CCTV.

Wala na na-record sang CCTV camera ang pagbuno sang tatlo ka mga suspek sa biktima tungod naguba na, suno sa police.

Pagkatapos sang krimen, dali-dali nga nagpalagyo ang mga suspek sa diin nakita pa sila sang barangay kapitan nga nagalakat gani ginpapondo tungod curfew na.

Sang ginhambalan sang kapitan nga i-turn over sila sa police, nagpalagyo ang tatlo kag naglangoy sa suba gani wala naabutan, suno sa police.

Nakilala ang tatlo ka mga suspetsado sa krimen nga taga-Aklan kag anay mga trabahador man sang poultry farm ang duha sa ila.

Ginasundan sang police nga motibo amo ang utang. May utang na ang tatlo sa biktima kag posible liwat nga nangutang pero wala ginapasugtan, suno sa police. — via Aksyon Farrah Mae Morano