ILOILO CITY — Pasakaan sang reklamo sang Traffic and Transportation Management Office (TTMO) ang driver sang modernized jeepney nga ginkumos kag ginhaboy ang citation ticket.
Sa post sang TTMO, gin-flag down sang traffic enforcer ang driver sang modernized jeepney tungod nagpasakay sang pasahero sa “No Loading Area” sa E. Lopez, Jaro.
Tungod sa aktuwasyon sang driver, pasakaan sang kaso nga Disobedience to Lawful Order, Unjust Vexation, kag Oral Defamation ang driver.
DEPENSA SANG DRIVER
Suno sa driver, wala man siya nagba-is sa traffic aide sang gindakop siya apang naglain ang iya buot tungod wala gindakop ang iban pa nga mga jeep nga nag-pick up man sang pasahero sa iya ginpondohan samtang gina-isyuhan siya sang ticket.
Ginlagas sang traffic aide ang driver tungod sa pagkumos kag paghaboy niya sang ticket kag naabtan sa atubang sang Hall of Justice.
Nanindugan man ang driver nga wala siya nakahambal sang malain nga tinaga sa traffic aide sang gindakop siya, baliskad sa panaysayon sang traffic aide sa police.
Makapamatuod suno sa iya ang kuha sang CCTV sang jeep nga wala siya nakapamuyayaw sa traffic aide.
