Asawa patay sang gintiro sang iya bana nga miyembro sang Phil. Army sa Calinog; Bana patay man sang gintiro ang kaugalingon

ILOILO — Patay ang asawa sang gintiro sang iya bana nga miyembro sang Philippine Army sa Barangay Badlan Pequeño, Calinog las-10 kagab-i.

Pagkatapos tiruhon ang iya asawa, gintiro man sang soldado ang iya kaugalingon.

Nagaranggo sergeant ang 35-anyos nga bana nga assigned sa Jamindan, Capiz, housewife naman ang 37-anyos nga asawa.

Suno kay Police Captain Melvin Mercado, officer-in-charge sang Calinog Municipal Police Station, nag-away pa ang mag-asawa antes natabo ang pagpangtiro sa sulod sa kwarto.

May kabataan ang mag-asawa nga natabuan yara sa balay sang ila himata nga malapit lang sa ila gina-istaran.

Nakabati na lang sang lupok ang mga paryente sang mag-asawa kag nasapwan sila nga patay na.

Pagpangimon kag financial problem ang anggulo nga ginasundan sang pulis sa insidente.

Suno kay Mercado, pareho nga nagapangimon ang mag-asawa sa isa kag isa.

Nakaagum sang pilas sa nagkalain-lain nga parte sang lawas ang asawa samtang sa sag-ang ang pilas sang bana.

May na-recover nga caliber 45 nga pusil sa lugar. — Aksyon Maria Kayla Tingzon