Driver sang motorsiklo patay sang nagsuhot sa likod sang 6-wheeler truck sa Cabatuan

ILOILO — Gindeklarar nga dead-on-arrival sang attending physician sa Ramon Tabiana Memorial District Hospital sa Cabatuan ang driver sang motorsiklo sang nakabunggo kag nagsuhot sa likod sang 6-wheeler truck pasado las-5 kaina sang kaagahon sa Brgy. Talanghauan, Cabatuan.

Ginkilala ang driver sang motorsiklo kay Felberth Ceballos sang Gaub, Cabatuan.

Base sa pag-imbestigar sang Cabatuan Municipal Police Station, naga-atras halin sa garahe ang truck sang nabungguan sang motorsiklo nga padulong sa direksyon sang Sta. Barbara.

Nabuho ang ding-ding sa likod sang truck samtang wasak naman ang atubangan sang motorsiklo tungod sa impact sang pagkabunggo.

Suno sa driver sang truck, hinali lang may naglagapok sa likod samtang naga-atras siya. Dugang pa sang driver, naggamit man siya sang signal light samtang naga-backing.

Natalana pa nga ma-istoryahanay ang pamilya sang biktima kag driver sang truck. — via Aksyon Marvin Malificiar