ILOILO—Naka-agum sang pilas ang magpakaisa sang ginlabu sang ila nga tiyo sa Cubay, San Enrique las-11:30 kagab-i, Disyembre 31.
Napilasan sa tuo nga guya si Ronnel, 46-anyos, samtang napilasan man sa tuo nga abaga si Raymund, 28-anyos. Ang suspect ginkilala naman kay Nonito, 71-anyos kag lunsay mga residente sang amo man nga barangay.
Suno kay PLT Cristibal Dalde, officer-in-charge sang San Enrique Municipal Police Station, naga-inum-inom ang magtiyo sa ila man nga compound sang natabo ang pagpanglabu.
Samtang naga-inum-inom ang mga involved, nabatian sang tiyo nga nagapalabtik sang istorya ang duha niya ka hinablos.
Tungod sini, nanginit ang tiyo rason nga nagpauli kag ginkuha ang binangon.
Pagbalik niya, gulpi niya lang ginlabu ang duha niya ka mga hinablos.
Dugang pa sang police, gin-ako sang tiyo nga madugay na siya nga nagapanginit sa iya mga hinablos tungod sa ila nga batasan.
Gin-ako sang tiyo nga na-impito siya rason nga ginlabu niya ang duha niya ka hinablos.
Gindala sa ospital sa Passi City si Ronnel, samtang gin-refer naman sa ospital sa siyudad sang Iloilo si Raymund tungod sa mas malala nga naagum nga pilas.
Natalana mag-istoryahanay ang pamilya kun ano ang plano nila sa ila tiyo. — Aksyon Marvin Malificiar
