Delivery rider nga babaye nagreklamo nga ginbuyayaw kag ginsakit sang customer tungod sa lain nga unod sang parcel; customer nagdepensa sa akusasyon
ILOILO CITY — Nagreklamo sa police station ang delivery rider nga si Rossie Mae Jetonso tungod sa pagbuyayaw, pagtawag sa iya nga scammer kag pagsakit sang customer.
Natabo ang insidente sang nag-deliver si Jetonso sang parcel ni Elmor sa Ingore, La Paz pasado las-4:30 kahapon sang hapon, Enero 17.
Ginpahayag ni Jetonso nga antes ang delivery, nagtawag siya sa customer nga malapit na siya sa area kag nagapangayo kun diin ang ensakto nga lokasyon sang ila balay.
Pag-abot niya sa lugar, ginkuha sang customer ang parcel kag nagbayad. Pero makaligad ang pila ka minutos, ginlagas siya sang customer kag ginsinggitan nga scammer tungod lain ang sulod sang parcel nga gin-order.
Nagdesisyon si Jetonso nga kuhaan sang video ang ila pagbaisay tungod ginabuyayaw kag ginaturasok na siya ni Elmor.
Gulpi lang suno sa iya nga ginku-ot sang customer ang iya belt bag kag ginkuha ang P1,050 nga kwarta.
Suno sa iya, masobra P1,200 ang bayad sang customer sa parcel.
Ginpahayag ni Jetonso nga nagtabog siya sa iya motorsiklo sang ginpatup-an siya sang customer.
Nagreklamo sa barangay ang rider sa natabo rason nga nabalik ang kwarta nga ginkuha sang customer.
Nagpa-medical check-up si Jetonso tungod sa pagpalanakit sang iya lawas. Nagpanugyan man ang iya kompaniya nga mag-file sang reklamo batok sa customer.
Gin-ako ni Jetonso nga na-phobia siya sa natabo gani wala siya naka-duty.
DEPENSA SANG CUSTOMER
Ginpanginwala ni Elmor nga nakapatupa siya kay Jetonso sang nagbaisay sila.
Suno kay Elmor, wala man niya gintawag nga scammer ang rider.
Pasado las-3:30 sang hapon suno sa iya sang nagtawag ang delivery rider kag nagpahibalo nga ara na sa area kag nagpangayo sang ensakto nga lokasyon sang ila balay.
Sang nakaabot ang delivery rider, gilayon nga nagbayad si Elmor para sa foldable cabinet nga gin-order.
Nakahalin na ang delivery rider sang ginbuksan nila ang parcel kag nakibot nga isa ka dosena nga hanger kag ginunting nga mga karton ang sulod sang parcel.
Ginlagas ni Elmor ang delivery rider tubtob nga naabtan sa bangga kag natabo ang pagbinaisay.
Luyag ni Elmor makuha ang kwarta nga P1,246 nga ginbayad sa parcel rason nga ginpunggan niya ang rider.
Tungod sa emosyon, gin-agaw ni Elmor ang belt bag sang rider tubtob nga nag-agaway na sila nga duha kag natumba ang rider.
Sa pagpangusisa sang Aksyon Radyo Iloilo news team, may witness nga nakakita sa natabo kag ginpanindugan nga wala nakapatupa si Elmor sa rider.
