P16,000 nakuha sang 2 ka fixers nga nang-scam sa mangunguma nga nag-apply sang driver’s license

Naglab-ot sa P16,000 ang nahatag sang mangunguma nga nag-apply agud makakuha sang driver’s license sa duha ka fixers nga nang-scam sa iya.

Sa report sang Land Transportation Office (LTO) 6, nagsalig ang biktima nga si alyas Kano, nga lehitimo ang pagpatigayon sang iya kasilingan nga si alyas Em-em agud makakuha siya sang lisensiya.

Una nga nagbayad sang P4,500 si Kano kay Em-em kag nasundan sang P6,000 nga nakuha niya sang nabaligya ang iya rice harvester.

Pero ginpangayuan pa gid siya sang dugang nga kantidad agud matapos ang application nga naglab-ot sa P16,000.

Nahibaluan man ni Kano nga may upod pa si Em-Em nga fixer sa guwa sang LTO6 nga si alyas Alan.

Nagligad lang ang apat ka bulan pero wala makuha ni Kano ang iya lisensiya gani nagdangop siya sa LTO.

Natukiban nga wala sang application nga nakapangalan kay Kano.

Ginatinguhaan pa ni Kano upod ang personnel sang LTO6 nga mapangita pero wala nadakpan.

Nagpasalig ang LTO6 nga buligan si Kano agud makakuha sang lisensiya lakip na ang legal assistance pananglitan magpasaka siya sang kaso batuk sa fixers.