Magnobyohanay kag iban pa nga nagalagaw sa Lambunao Plaza ginsumbag sang 3 ka lalaki nga naka-inom kag armado sang pusil, kutsilyo

ILOILO — Gulpi lang ginsumbag sang tatlo ka mga lalaki nga naka-inom ang nagapungko kag naga-cellphone sa Lambunao Plaza las-4 kahapon sang hapon.

Suno kay alyas Che-che, nobya sang ginsumbag, nagapungko lang sila sang ginpalapitan sang tatlo ka mga lalaki nga naka-inom sang makahulubog nga ilimnon kag ginsumbag ang iya nobyo.

Sa pagkahibalo ni Che-che taga-Lambunao man ang mga nagpang-harass sa ila.

Natublag pa kanday Che-che sang nakita nga may pusil kag kutsilyo ang mga suspek.

Ginlagas sang mga tricycle drivers kag pulis ang tatlo gani nadakpan.

Wala naman na-recover ang kutsilyo kag pusil nga sa pagpati ni Che-che ginpanghaboy sang tatlo samtang ginalagas sila sa katalunan.

Samtang ginapa-record ang insidente sa police station, naabtan ni Che-che nga may tatlo pa ka indibidwal nga nabiktima man sang mga suspek.

Sa pagpalab-ot ni Che-che sa ila eksperiyensiya, indi niya luyag makatuga sang kahadlok gani nagpanugyan sa publiko nga kon nagatambay kag maglagaw sa plaza, mag-aligmat sa palibot bisan masanag pa.