ILOILO CITY — Patay ang menor-de-edad sang ginbuno sang kapareho nga menor-de-edad sa Rizal Estanzuela, City Proper subong nga aga.
Ini ang ginkumpirmar ni Police Captain Michael Tuburan, Officer-in-Charge sang Police Station 7.
Suno sa 16-anyos nga si alyas Nene, nobya sang suspek nga si alyas Ian, 17-anyos, las-8 kagab-i sang naga-inom-inom ang iya nobyo kag biktima nga si alyas Vince sa isa lang ka lamesa sa dike sang Brgy. Rizal Estanzuela.
Pareho nga imbitado ang suspek kag biktima sa birthday celebration sang ila abyan. May nagluntad nga komosyon sa tunga sang suspek kag biktima.
Gin-ako ni Nene nga anay nobyo niya ang biktima.
Gindala pa sa ospital ang biktima apang gindeklarar nga dead-on-arrival tungod sang madamo nga pilas sa lawas.
Na-aresto ang suspek sa hot pursuit operation kag yara na sa custody sang Department of Social Welfare and Development (DSWD). — Aksyon Angel Mae Ciudad/Robert Nietes
