Bodega sang isda nasunog sa Mandurriao

ILOILO CITY — Totally damaged ang bodega sang isda sang nasunog sa Barangay San Rafael, Mandurriao mga las-11:17 sang Enero 27 sang gab-i.

Suno kay FO2 Jhon Paquito Verano, imbestigador sang Iloilo City Fire Station, madasig nga naglapta ang kalayo tungod human sa light materials ang bodega.

Wala na naglaton sa iban nga istruktura ang kalayo tungod may konkreto nga pader nga naga-separat sa kaiping nga grocery store.

Sa pagpangusisa sang mga bumbero sa tag-iya, wala siya sang ideya sa kun diin naghalin ang kalayo tungod nakapauli na sila mga las-9 sang gab-i.

Lakip sa mga natupok sang kalayo ang styro box nga ginasudla sang isda, karito sang salakyan kag refrigerator nga wala na nagaandar.

Naglab-ot sa ginabanta P10,500 ang balor sang kahalitan sang sunog.

Gindeklarar nga fire out las-11:32 sang gab-i. — Aksyon Maria Kayla Tingzon